563 raste të testuara, 51 rezultojnë me koronavirus

“Në 24 orët e fundit u testuan 31 raste të dyshuara me COVID-19, qytetarë dhe personel shëndetësor, ku rezultuan pozitiv 9 raste. Deri në këto momente në total janë testuar 563 raste të dyshuar pozitiv, dhe rezultojnë 51 raste me COVID-19”.

Kështu deklaroi sot, zv/Ministrja e Shëndetësisë Mira Rakacolli, në komunikimin e përditshëm me mediet, mbi situatën e COVID-19 në Shqipëri. “Në vijim të punës së kujdesshme dhe profesioniste të bërë nga ISHP dhe njësitë e kujdesit vendor, për identifikimin dhe gjurmimin e rasteve, në 24 orët e fundit janë testuar 31 persona të dyshuar, qytetarë dhe personel shëndetësor, prej të cilëve janë konfirmuar 9 raste të reja me COVID-19”, tha ajo.

Deri në këto momente janë testuar 563 raste të dyshuara dhe prej tyre janë të konfirmuar pozitivë me COVID-19, 51 raste:

Nga rastet e konfirmuara pozitivë:

Tiranë 34 raste

Durrës 5 raste (njëri prej të cilëve ka ndërruar jetë)

Lushnje 2 rast

Elbasan 2 raste

Fier 6 raste

Rrogozhinë 2 raste

Rakacolli tha se “prej tyre 20 janë të shtruar në spitalin Infektiv (nga Tirana, Durrësi, Fieri, Lushja dhe Rrogozhina).

“Prej tyre janë në terapi intensive tre qytetarë, njëri prej të cilëve në respiracion të drejtuar. Ndërsa pjesa tjetër e të shtruarve në pavion janë në gjendje të stabilizuar deri në këto momente”, tha ajo.

Në vijim të hetimit të hollësishëm epidemiologjik të filluar ditën e djeshme në spitalin “Shefqet Ndroqi”, Rakacolli tha se “kanë dalë pozitiv edhe 4 raste personel shëndetësor (një mjek dhe 3 infermierë) të cilët kanë qenë në kontakt me pacientin, i cili aktualisht po trajtohet në spitalin infektiv dhe që, më herët ka qenë i shtruar në spitalin “Shefqet Ndroqi”.

“Siç ju kemi njoftuar, nga gjurmimi i kryer, ky pacient është vizituar në spital nga një i afërm që vinte nga Italia, dhe që nuk e ka dhënë këtë informacion tek stafet mjekësore”. Personeli është në gjendje të mirë shëndetësore, pa simptoma dhe i vetëkarantinuar.

I

nstituti i Shëndetit Publik po vazhdon pa u ndalur hetimi epidemiologjik dhe testimi i rasteve të dyshuara”, tha ajo.

Rakacolli përsëriti edhe një herë thirrjen për qytetarët që të telefonojnë në numrin 127! “Jepuni informacion të hollësishëm stafeve mjekësore! Nëse mbani të fshehtë informacionin e lëvizjeve tuaja nga personeli shëndetësor, rrezikoni të infektoni personelin dhe të afërmit tuaj. Sot është detyrim që të mbrojmë personelin shëndetësor. Ju lutem qytetarë, shmangni vajtjet direkte në spitale. Qëndroni në shtëpi! Respektoni rregullat e reja! Një thirrje sidomos për të moshuarit mbi 70 vjeç: Ju lutem mos dilni nga shtëpitë”, tha ajo.

Author
Hermes News

Redaksia

Shkruaj një koment

0 Komentet