OFL i dërgon 2 personave të dënuar jashtë vendit formularin

Në kuadër të zbatimit të ligjit special për masat pasurore ndaj individëve të dënuar apo akuzuar për krim të organizuar apo krime të rënda, OFL “Operacioni Forca e Ligjit”, i ka nisur sot kërkesat me shkrim për vetëdeklarimin e burimeve të pasurisë, 2 shtetasve të tjerë.

OFL i ka nisur sot formularin e deklarimit të pasurisë 2 shtetasve, A. K., banues në Durrës, i dënuar në Gjermani për vepra penale në fushën e narkotikëve; – B. P., banues në Koplik, Shkodër, i dënuar në Belgjikë për trafik të qenieve njerëzore.

“Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së. Më pas, përgjigjet e marra do t’i dërgohen SPAK-ut, i cili brenda jo më shumë se 15 ditësh, duhet të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre”, bën të ditur OFL.

Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit dhe në jo më shumë se 6 muaj Gjykata Speciale duhet të vendosë për konfiskimin përfundimtar të tyre.

“Theksojmë se të gjithë personat që iu është dërguar kërkesa me shkrim për vetëdeklarimin e burimeve të pasurisë, i kanë plotësuar formularët dhe i kanë dorëzuar të gjithë pranë OFL-së, e cila ka vijuar me procedurat sipas përcaktimit në aktin normativ nr. 1 , të datës 31 janar 2020. OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë”, thuhet në njoftimin e OFL-së.

Me subjektet e thirrura sot, numri i subjekteve ka arritur në 11 dhe thirrjet e bllokut të parë (të dënuar) do të vijojnë deri në subjektin e fundit të regjistrit të vendimeve të formës së prerë

OFL në bashkëpunim me strukturat e Policisë së Shtetit në të 12 qarqet e vendit, po verifikon dhe sekuestron automjetet e këtyre subjekteve.

Author
Hermes News

Redaksia

Shkruaj një koment

0 Komentet