Shqiptarët nuk ia dorëzojnë kujt liritë e fituara

TIRANË - Presidenti i Republikës, Bujar Nishani, tha se ishte "befasues" p/ligji i Këshillit të Ministrave për të kriminalizuar shpifjen.

“Befasues për mua si qytetar i këtij vendi, por edhe si President i Republikës u shfaq projektligji i qeverisë që kërkon rikthimin e burgimit për gazetarët me pretendimin e luftës ndaj shpifjes. Jo pak herë si politikan, si ministër, si President i Republikës, kam qënë dhe vazhdoj të jem objekt i tyre, por kam besuar dhe vazhdoj të besoj se burgosja e një gazetari është burgosje jo vetëm e fjalës, por e vetë lirisë, është goditje e sistemit demokratik, papajtueshmëri me të”. “Me fjalën mund të abuzohet dhe çdo abuzim është i kritikueshëm, por me ndrydhjen e saj mund të abuzohet shumë më tepër. Ndërmjet frikës për t’u shprehur dhe lirisë së shprehjes unë do të bëj çdo ditë të punës sime betejën për këtë të fundit”, nënvizon Presidenti i Republikës. “Jam i bindur se shqiptarët, të cilët 25 vjet më parë, në dhjetor, me protestat e studentëve vranë frikën për të fituar lirinë e fjalës, nuk do t’ja dorëzojnë askujt liritë e fituara. Nuk do ta burgosin fjalën në emër të frikës, por frikën për fjalën”, përfundon postimin e tij Presidenti Nishani.

Author
Hermes News

Redaksia

Shkruaj një koment

0 Komentet